Mateo Mena: Detrás do azul. Work in progress

Venres 24 de xullo | Vigo | 10.30 e 12.30 horas

Mateo Mena é un dos artistas sonoros máis interesantes e inquietos de España. Investigador de fenómenos situados na confluencia entre ecoloxía e electromagnetismo, deseñou dispositivos electrónicos que exploran a dimensión acústica da natureza acurralada pola tecnoloxía.

Detrás do azul é un proxecto de investigación artística “en progresión”, que levou a Mena a visitar diversos lugares illados nos circulos polares. Nestas xeografías, aínda é posible escoitar, mediante antenas e receptores feitos a man, as emisións de radio xeradas polo noso propio planeta. Froito desta experiencia, xurdiron propostas que transcenden a dependencia visual da nosa relación coa atmosfera e alcanzan novas sensorialidades.

Nesta contorna tan especial, observando as estrelas do planetario, Mateo Mena presentará os proxectos Coros do amencer, que investiga a relación entre o canto dos paxaros e os sons da ionosfera; Ivpiter Fvlgvr, un sintetizador que recolle e modifica as tormentas electromagnéticas do planeta Xúpiter; e Aurora Consurgens, unha colaboración con artistas das rexións ártica e subantártica que toma como punto de encontro o fenómeno das auroras boreais.